馬古尼成交換籌碼　曼聯搶簽班夫韋迪

曼聯今個夏天將進行大換血，早前有報道指全隊只得3個球員係「非賣品」，不過今季成功重獲球迷歡心嘅哈利馬古尼，據報亦冇得留低，消息指曼聯打算搵佢作為交換籌碼，全力收購愛華頓年輕中堅班夫韋迪。

英國《每日星報》報道，曼聯新老闆拉特克利夫睇中班夫韋迪，呢位21歲英格蘭中堅被認定擁有「頂級球員」潛質，但愛華頓叫價高達7,000萬鎊，曼聯打算將哈利馬古尼加入交易，作為收購班夫韋迪嘅籌碼，而熱刺同皇家馬德里亦對班夫韋迪虎視眈眈。

31歲嘅哈利馬古尼上年原本已被曼聯掛牌，但佢決心留隊競爭，並用出色表現成重獲正選，不過考慮到佢嘅年紀、踢法、人工同只剩1年合約，曼聯將會喺夏天尋求買家接手。曼聯視班夫韋迪同利辛度馬天尼斯為未來中堅拍檔，重建球隊防線。