沙拿高普冰釋前嫌　追平朗尼神奇紀錄

利物浦喺英超4比2大破熱刺，數字上仍然有機會成為聯賽冠軍，不過球迷更開心係，穆罕默德沙拿同高普嘅「反面鬧劇」似乎已結束。沙拿今仗重返正選，並交出1入波+1助攻成績，賽後獲高普大力讚揚，而佢亦追平朗尼嘅英超入球、助攻「雙十」紀錄。

沙拿上場聯賽後備上陣，同高普發生激烈爭執，賽後嘅「唔想辣火頭」回應，亦令將帥反面傳閘愈傳愈烈，不過今場沙拿復任正選有入波又有助攻，今季聯賽數據增至18個入球同10次助攻，成為英超史上首個連續3季入波+助攻「雙十」球員，亦追平朗尼喺5個球季錄得「雙十」嘅紀錄，印證利物浦傳奇地位。

高普賽後亦唔吝嗇對沙拿嘅讚美：「沙拿冇得頂，踢出非常好嘅比賽，佢同哈維艾利洛喺右路好有威脅，我好戥佢開心。冇球員想自己踢得唔好，點解佢哋要咁做？沙拿用表現證明自己嘅能力。」