高爾彭馬幫車仔翻生　下季有機踢歐霸盃

今季成績沉淪嘅車路士，季尾成績突然反彈，周日(5日)主場5比1大破韋斯咸後，依家只係落後第5位嘅熱刺6分，而且曼城如果月尾捧埋英足盃冠軍，個歐霸盃參賽資格會轉移畀英超第6位，如無意外將由車路士、紐卡素同曼聯競逐。

車路士近3場聯賽2勝1和，對韋斯咸一仗憑高爾彭馬先開紀錄，加上干拿加拉查、馬度基同尼高拉斯積遜(2球)入波，主場大炒5比0。高爾彭馬今季有21個入波+9次助攻，成為車仔史上第5個單季貢獻30球球員，同哈索賓基(00/01)、林柏特(04/05、09/10)、杜奧巴(09/10)、夏薩特(18/19)幾位傳奇並列，肩負車路士復興希望。

由長期位處中游，都依家有機會爭入歐霸盃，領隊普捷天奴表示：「我哋會盡力爭入歐洲賽，踢歐洲賽對球隊同球員都有好處，但我哋係車路士，如果球季未能捧盃，就稱唔上係成功嘅球季，我要再次強調，車路士嘅目標一直係贏冠軍。」

彭馬仔順風順水，但韋斯咸射手查洛保雲就慘到爆，今場個人另類「連中三元」，上下半場夾埋有3次射門中楣，如果其中一球入咗，成場波個結局可能唔同晒。