歐聯最強中場　域天拿獲PSG加薪續約

巴黎聖日耳門(PSG)力追歐聯冠軍夢，除咗基利安麥巴比係主角之外，葡萄牙國腳域天拿都係關鍵人物。呢位24歲中場今季成為教練安歷基愛將，擔任PSG中場「節拍器」，更係歐洲足協目前歐聯評分最高嘅中場球員，據報PSG已準備同佢續約，並會大幅加薪獎勵佢嘅優異表現。

PSG季初用文路爾烏加迪做防中掃蕩，但安歷基發現後場組織力不足，所以將域天拿轉去「6號位」，呢個位置亦令域天拿大放異彩，今屆歐聯有94.1%傳球成功率，根據歐洲足協官方球員評分系統，域天拿有365分成為最強中場，更勝菲爾科頓(328分)、費達砥高華維迪(307分)等猛將。

安歷基早前曾表示：「對我呢種風格嘅教練嚟講，域天拿係完美球員，佢唔會甩波，又可以搶波，可以射門又可以傳球，我期待佢繼續進步。」域天拿2年前加盟PSG，月薪只有70萬歐元，據報PSG準備向佢大幅加薪續約，令佢成為陣中10大高薪球員之一。