列奧斯誓圓「溫布萊循環」　下一站美職

德國球星馬高列奧斯宣布季尾離開多蒙特，結束12年「蜜蜂生涯」，喺今季餘下賽事，最大目標無疑係歐聯冠軍。馬高列奧斯喺多蒙特嘅第1季，即隨球隊殺入溫布萊上演嘅歐聯決賽，12年後嘅多蒙特最後一戰，當然亦想喺溫布萊球場踢歐聯決賽告別。

34歲嘅馬高列奧斯喺多蒙特青訓出身，但之後離隊6年，2012年由慕遜加柏重返多蒙特，第1季就協助球隊殺入歐聯決賽，可惜喺溫布萊舉行嘅決賽不敵拜仁慕尼黑。今屆歐聯決賽又喺溫布萊上演，多蒙特教練泰錫表示：「列奧斯喺多蒙特第1季就係溫布萊踢歐聯決賽，今季再返去係完美劇本，一個循環嘅完美句號。」

列奧斯已表明無意退休，之前盛傳沙特球會艾納斯對佢好有興趣，而土超球隊亦虎視眈眈。不過德國媒體報道，呢位中場屬意去美職落班，跟隨前德國國腳舒韋恩史迪加嘅步伐，目前已有多間美職球會作出接觸，考慮到美斯、蘇亞雷斯、基奧特等球星紛紛加盟，列奧斯好可能亦會加入呢個行列。