突然清空利物浦相片　達雲紐尼斯勢離隊

利物浦日前4比2擊敗熱刺重拾勝軌，有人發現紅軍射手達雲紐尼斯突然將個人社交網上關於佢利物浦相片全部刪除一空，隨即傳出離隊消息，下一站可能去巴塞接班羅拔利雲度夫斯基。

利物浦上季以8,500萬歐元由賓菲加簽入達雲紐尼斯，加盟首季踫上球隊陷入低潮，一度被批評為水貨，結果球隊聯賽跌出前4，但佢仍交出15球。

今季達雲紐尼斯表現明顯改善，球隊亦重奪英聯盃，不過佢已經8場食白果，總計今季交出18入球13助攻，數據其實唔差，但好多人只記得佢經常浪費門前機會，呢位烏拉圭前鋒亦因而飽受批評，踢到冇癮。

達雲紐尼斯個人IG內，有關利物浦相片已經清空，只留番關於家人同烏拉圭國家隊相片，外間估計係佢打算同利物浦劃清界線，季尾離隊，而坊間反應平靜，有球迷祝佢一路順風添。

由於利物浦來季將由荷蘭新帥施洛執教，達雲紐尼斯被踢走不足為奇，據報佢好大機會去西甲發展，巴塞有意簽佢，而頂替年事已高嘅羅拔利雲度夫斯基。