傾掂數　盧比迪古來季執教韋斯咸

韋斯咸今輪淨吞車路士5蛋後，「錘仔幫」已經拍板來季新帥人選，就係前皇馬及狼隊教頭盧比迪古，據報雙方達成協議，莫耶斯季尾離隊，盧比迪古來季上任。

「轉會專家」羅曼諾報道，盧比迪古已接受韋斯咸報價，談判進行到最後階段，現時雙方正敲定細節，之後就會簽約作實。

韋斯咸同領隊莫耶斯今季約滿，會方無意續約而打算換帥，球隊近期表現急速下滑，包括歐霸盃出局，近4場聯賽1和3負，狂失14球，上場淨吞車路士5蛋亦加快韋斯咸高層物色新帥速度，結果選定盧比迪古。

57歲嘅盧比迪古球員時代踢過皇馬同巴塞，曾擔任皇馬、波圖、西班牙國家隊及西維爾主帥，2019至20年度協助西維爾贏得歐霸盃冠軍，上季擔任狼隊領隊，今季季前因不滿會方組軍方針，於開咧前辭職，並待業至今。