賽前體測肥佬？傳莊尼伊雲斯被逼上陣

曼聯中堅荒問題嚴重，利辛度馬天尼斯、哈利馬古尼、華拉尼、域陀連迪路夫同甘華拉同時受傷，連常任「替工」勞基梳爾都傷埋，今場對水晶宮起用「客串」嘅卡斯米路搭啱啱傷完嘅莊尼伊雲斯，但有傳聞指莊尼伊雲斯原來賽前體測「肥佬」，不過領隊坦哈格喺無兵可用下，無奈要求佢頂硬上。

36歲嘅莊尼伊雲斯因肌肉受傷缺陣1個月，幾日前先至復操，今仗即臨危受命正選上陣。據《Utddistrict》等多個曼聯球迷網站報道，莊尼伊雲斯喺比賽前嘅體測未能過關，但佢作為球隊唯一一個正規中堅，坦哈格只能要求佢紮住上陣，最終佢亦踢足全場。

莊尼伊雲斯體測肥佬傳聞未能證實，不過坦哈格喺臨開波前接受《MUTV》訪問，就承認莊尼伊雲斯其實唔適合踢正選：「好開心伊雲斯復出，做正選並唔係我原本計劃，但佢有需要咁做(正選上陣)，相信佢可以應付。伊雲斯好重要，佢可以幫助身邊年輕球員，相信佢可以踢出水平。」