奧利斯解約條款今夏生效　5大豪門搶人

水晶宮翼鋒米高奧利斯上場英超射入2球，協助球隊以4比0大勝曼聯，表現光芒四射。根據《ESPN》爆料，呢位22歲新星嘅解約條款將於今夏生效，其他球會只需要支付5,000萬鎊(約4.9億港元)至6,000萬鎊(約5.9億港元)解約金，就可以買斷佢，曼聯、阿仙奴、曼城、利物浦、紐卡素都計劃搶簽米高奧利斯。

米高奧利斯2021年夏天由雷丁轉投水晶宮之後，表現愈來愈好，上年4月對列斯聯，貢獻3次助攻，成為英超史上最年輕助攻「戴帽」球員，當時已傳出車路士、拜仁慕尼黑有意收購佢。雖然米高奧利斯今季經常受傷，僅於英超上陣17次，但仍然有9球進帳及4次助攻，創下職業生涯單季最多入波紀錄。

早前已傳出曼聯、阿仙奴、曼城、利物浦睇中米高奧利斯，英國《每日郵報》指紐卡素現時亦加入爭奪。雖然米高奧利斯剛於上年8月續約4年，但包含解約條款，並將於今夏生效，據悉佢渴望踢歐聯，阿仙奴、曼城、利物浦喺爭奪戰之中，應該可以佔先機。