仲未吸取教訓　車路士又出手買烏克蘭國腳

車路士上年1月以天價8,800萬鎊(約8.6億港元)收購梅迪歷，但呢位翼鋒表現令人失望，會方仲未吸取教訓，計劃再次出手簽烏克蘭國腳。根據英國《每日郵報》爆料，車仔已經派人接觸薩克達中場蘇達高夫嘅經理人，討論呢位21歲新星今夏上「車」嘅可能性。

蘇達高夫今季為薩克達及烏克蘭國家隊，合共轟入8球，引起車路士方面注意，並已展開收購工作，除咗接觸蘇達高夫嘅經理人之外，兩間球會管理層亦有聯繫，薩克達行政總裁沙治柏堅曾於上月入場睇車路士主場對愛華頓，當時可能已經有傾交易事宜。

車路士上年以重金向薩克達收購梅迪歷，令呢支烏克蘭傳統勁旅大賺一筆，雙方關係良好，車仔今次提出簽蘇達高夫，相信薩克達會方應該唔會拒絕。估計蘇達高夫身價為6,500萬鎊(約6.4億港元)，佢同梅迪歷同聲同氣，如果可以一齊喺車路士並肩作戰，或者能夠產生化學作用。