拜仁選帥繼續碰壁　施丹、哥帥公開拒絕

拜仁慕尼黑教練杜曹季尾離任，選帥行動亦火速進行，不過3大目標沙比阿朗素、拿高斯文同蘭歷克先後拒絕接手，令呢支德甲班霸陣腳大亂。據報拜仁正擴大物色範圍，可惜唔少上榜名帥都耍手擰頭，施丹同哥迪奧拿日前就公開請食檸檬。

前皇馬教練施丹被視為拜仁主要目標，呢位法國名帥日前出席F1邁阿密站賽事，被問到點睇拜仁對皇馬嘅歐聯，佢就話：「希望皇馬晉級，不過比賽會好困難。」施丹再被追問執教拜仁嘅傳聞，佢斬釘截鐵回應：「我會唔會教拜仁？唔會！我只係去睇比賽。」

德國媒體爆料，拜仁新帥名單有艾美利、迪沙比、盧比迪古等名字，前教練費歷克同哥迪奧拿亦榜上有名，不過哥帥代表隨即畫清界線，向德國《天空體育》表示：「哥迪奧拿心入面仍有拜仁，但佢唔想喺夏天離開曼城，佢教得好開心，而且有份到2025年嘅合約，重返拜仁並唔喺佢計劃之內。」