曼聯騎呢內訌　安東尼講坦帥壞話遭篤灰

曼聯淨吞水晶宮4蛋震憾英倫，賽後再傳出「騎呢內訌」，事件主角安東尼步出球場期間揞嘴與美臣蒙特交談，狀甚憤怒，據報交談內容涉及安東尼曾經講坦哈格壞話，但遭內鬼舉報，鬼頭仔懷疑係美臣蒙特！

巴西《環球體育》報道，外號「圓規」嘅安東尼曾在曼聯球員內部群組中，將坦哈格稱為禿蛋頭（bald egg head），事後遭隊友告密，將截圖交畀坦哈格，令坦帥大感憤怒而向安東尼訓斥，責令對方跪低道歉，否則就要步查頓辛祖後塵。

曼聯慘敗於水晶宮腳下之後，球員步出球場期間就出現呢一幕，安東尼揞嘴向美臣蒙特質問，神態憤怒，美臣蒙特被懷疑係篤灰者，為討好坦帥而告發安東尼，背後原因係兩人同屬坦哈格嫡系球員，美臣蒙特告發安東尼係為咗爭寵。

上述傳聞未有獲得官方證實，有可能巴西傳媒故意捏造，不過事實係安東尼同美臣蒙特都出名又廢又貴，已成為坦哈格嘅負累，亦係曼聯衰敗嘅根源，遲早被清洗。