拜仁將金玟哉列入解約名單　隨時出售

今季加盟拜仁嘅南韓中堅金玟哉，整體表現平平，上場歐聯4強首回合對皇馬就孭晒鑊，累球隊兩度失守而備受批評，據報該27歲中堅近日被拜仁列入解約名單，隨時出售。

德國傳媒報道，金玟哉今季以5,000萬歐元由拿玻里過檔拜仁，簽約5年至2028年，成為最高身價亞洲後備，亦係拜仁史上第3貴外援，但佢同烏柏美卡奴嘅合作未見突出，而金玟哉經常失位同鍾意鏟波嘅踢法，好多時成為球隊防線漏洞，引起球迷不滿。

據報拜仁將金玟哉列入解約名單，意味住只要收到合理報價，拜仁就會將其出售；南韓傳媒報道，金玟哉對此消息感到震驚，並表達強烈留隊意願。

嚟緊歐聯4強次回合再戰皇馬，由於馬菲斯迪歷特同艾歷迪亞有傷上陣成疑，拜仁雙中堅將會維持係金玟哉拍住烏柏美卡奴，金玟哉能否打動拜仁高層收回成命，就要靠自己本事。