【官宣】堤亞高施華重投富明尼斯　夥拍馬些路

車路士中堅堤亞高施華早前公布，將於今夏約滿離隊之後，依家落實重返巴西搵食，巴甲球隊富明尼斯正式宣布，簽入呢位39歲後衞，雙方簽約2年，佢將會着3號球衣，同前皇馬左後衞馬些路組成星級「老人防線」。

堤亞高施華同富明尼斯淵源深厚，曾於富明尼斯青年軍受訓，雖然之後離隊一段長時間，其後輾轉去歐洲搵食，但發展唔順利，2006年加盟富明尼斯，令事業回升，2009年轉投AC米蘭，展開球星之路。

堤亞高施華2020年夏天以自由身從巴黎聖日門轉投車路士後，上陣152場入9球，其中今季35次披甲有4球進帳，屬於車仔防線最可靠球員，證明佢寶刀未老。曾經傳出有沙特阿拉伯球會開出高薪邀請堤亞高施華加盟，但佢拒絕去中東掘金，最終選擇回巢富明尼斯幫手，夠晒有情有義。