「新大哨」遭沙維封殺　或離開巴塞

巴西新星洛基費拉拿今年1月正式由帕拉尼恩斯加盟巴塞隆拿後，原本被寄予厚望，但近期被教練沙維封殺，已接近1個月冇上陣。呢位19歲前鋒嘅經理人安迪古里表示，洛基費拉拿可能今夏永久離隊。

巴塞隆拿上年夏天收購洛基費拉拿，佢等到今年1月先至歸隊為呢支西甲勁旅上陣，並於2月對奧沙辛拿、艾拉維斯，連續2場入波，被睇好可以成為另一位「大哨」朗拿度。

不過，洛基費拉拿自4月中對卡迪斯後，就再冇上陣，引起經理人安迪古里不滿，佢話：「冇人知道點解沙維唔畀洛基費拉拿上陣，甚至唔同佢講嘢，令人難以置信，我哋選擇巴塞，係因為洛基費拉拿愛巴塞，所以當時拒絕其他球會開出多一倍人工嘅合約，都要加盟巴塞隆拿，佢唔可以再坐冷板，唔排除今夏離隊，但唔係外借，而係永久轉會。」

沙維原本今夏走人，但早前改變主意，下季繼續執教，如果洛基費拉拿想拯救足球事業，轉會可能成為唯一選擇。