曼聯好消息　利辛度有望復出鬥阿仙奴

根據英國《每日郵報》爆料，曼聯中堅利辛度馬天尼斯希望出戰5月25日晚英足盃決賽對曼城之前，復出踢聯賽以提升狀態。紅魔鬼今季只剩下3場英超，呢位26歲阿根廷國腳可能喺周日(12日)晚聯賽主場對阿仙奴候命。

利辛度馬天尼斯因為傷患問題，今季僅上陣11次，對上一次為紅魔鬼披甲，已經係3月底對賓福特。如無意外，利辛度馬天尼斯應該可以出戰英足盃決賽對曼城，佢希望把握今季最後3場聯賽上陣「熱身」，藉以操起狀態。

曼聯將於周日(12日)晚主場對阿仙奴，跟住16號凌晨主場對紐卡素，19號晚作客白禮頓，意味利辛度馬天尼斯最快有望下仗復出鬥兵工廠。紅魔鬼現時鬧中堅荒，除咗利辛度馬天尼斯之外，哈利馬古尼、域陀連迪路夫、華拉尼、甘華拉都正在養傷，卡斯米路客串中堅表現強差人意，如果利辛度馬天尼斯可以復出，對於曼聯而言絕對係一場及時雨。