阿仙奴計劃出售辛真高　拜仁紐卡素爭住買

早前傳出阿仙奴計劃今夏出售前鋒加比爾捷西斯之後，依家再爆出準備賣走左後衞辛真高，兵工廠將呢位27歲烏克蘭國腳標價為3,800萬鎊(約3.7億港元)，據悉拜仁慕尼黑、紐卡素都有意簽入辛真高。

阿仙奴2022年夏天用3,000萬鎊(約2.9億港元)向曼城收購辛真高，呢位「全能戰士」雖然可以勝任左後衞同防守中場，但入「廠」後，表現往往進退失據，特別係防守能力欠佳，領隊阿迪達今季寧願用積及基奧柯踢正選，甚至將踢慣右閘嘅富安健洋移去左閘，都唔用辛真高。

加上阿仙奴計劃收購前鋒，目標包括RB萊比錫射手施斯高，士砵亭前鋒基奧基尼斯，兩人身價不菲，出售辛真高等副選人腳集資，並唔令人意外。

西班牙媒體《Fichajes》指拜仁慕尼黑、紐卡素都對辛真高有興趣，阿仙奴唔想平賣，最起碼要求3,800萬鎊轉會費。

另外，富安健洋缺席近日操練，未知能否出戰周日(12日)晚英超作客曼聯。