曼聯斟介修夫基　歐國盃後拍板

曼聯慘敗於水晶宮腳下後動盪再起，領隊坦哈格面臨被炒命運，據報球會高層正與英格蘭領隊修夫基談判，預計未來幾星期可達成協議，可望於歐國盃後落實宣布。

雖然坦哈格仍然口硬，強調自己仍然係曼聯領隊最合適人選，但有分析指，坦哈格已失去高層支持，在消息滿天飛之際，高層未有發表任何支持坦帥言論，將坦哈格推向不利境地，難以取得球員信任。

法國《Foot Mercato》報道，曼聯視修夫基為新帥頭號人選，雙方正在談判中，但仍未達協議，希望短期內有結果，順利嘅話可望在歐國盃結束後落實宣布。

修夫基執教英格蘭國家隊年薪約250萬鎊，與英足總合約至今年底完結，英足總希望修夫基再續約兩年，領軍至2026年北美世盃，不過雙方談判未有結果。

除咗修夫基外，前主帥摩連奴亦來搞事，《曼徹斯特晚報》報道，現時待業嘅摩連奴同身邊朋友表示，願意再度執教曼聯，仲話自己同新股東拉特克里夫係朋友，可以直接「行入去」曼聯執教，不過佢亦知道曼聯再任命佢嘅機會好微。