達雲紐尼斯現身巴塞　探阿拿奧祖

早前被發現社交網刪晒有關利物浦相片嘅達雲紐尼斯，再發出新動態，內容係同烏拉圭國家隊隊友朗奴阿拿奧祖合照，據報兩人身在巴塞隆拿，似乎達雲紐尼斯雖然人在利物浦，但個心已經去咗巴塞。

達雲紐尼斯再發新動態，證明佢仍然係活躍用戶，同朗奴阿拿奧祖嘅合照上留言：「我嘅好兄弟」，有網友認出地點係巴塞隆拿，而事實上達雲紐尼斯妻子係加泰隆尼亞人，可能係陪老婆返鄉下順便探朋友，亦無意為過檔巴塞嘅傳聞避嫌。

呢位烏拉圭射手社交網內刪除晒有關利物浦嘅相片，甚至取消埋同利物浦相關媒體Watch LFC聯繫，同利物浦有關嘅只剩番同利物浦簽約嘅動態，同埋頭像係著住利物浦9號波衫嘅背影。

利物浦尚餘兩場賽事，分別對阿士東維拉同狼隊，係主帥高普領軍嘅最後兩場，亦可能係達雲紐尼斯嘅最後兩場。