紐亞百年一遇犯錯　拜仁重歷「黑色3分鐘」

拜仁慕尼黑喺歐聯4強出局，完場前經歷「黑色3分鐘」由贏變輸，令球迷重新勾起99年歐聯決賽對曼聯嘅慘痛回憶。更難以置信嘅係，拜仁今場罪人竟然係向來最可靠嘅門神紐亞，佢嘅「百年一遇」犯錯令球隊尾段崩潰。

拜仁喺99年歐聯決賽對曼聯，又係領先1比0去到比賽尾聲，但91分鐘被舒寧咸追和後，球員似乎接受唔到現實，結果93分鐘再被蘇斯克查入波絕殺，成為歐聯史上反勝經典。拜仁今場情況如出一轍，當祖斯奴追平後，球員明顯未平伏心情下，3分鐘內再失多球輸波。

皇馬88分鐘追平一球係比賽關鍵，今場屢救險球嘅紐亞撲雲尼斯奧斯祖利亞射門，竟然甩手撞心口彈開，被祖斯奴趕到射入，紐亞賽後失望表示：「真係傷心欲絕...個波比我預期位置更高，所以我接唔實，作為一個有經驗門將，呢啲事我唔係未遇過，呢個入球好殘忍。」

拜仁慕尼黑教練杜曹亦表示：「紐亞表現極佳，但佢出現一個100年都唔會犯嘅錯誤，好令人沮喪，我哋好清楚紐亞嘅能力，佢唔應該落得呢個結局。」