拜仁12年首次四大皆空　卡尼悲劇數字

拜仁慕尼黑喺歐聯出局後，今季肯定落得「四大皆空」結局，亦係呢支德甲班霸自2012年後首嘗「無冠」賽季。去年夏天以1億歐元加盟嘅哈利卡尼，今季45場比賽交出44個入波同12次助攻，喺歐聯同德甲都排射手榜第1位，但喺無冠嘅背景下，只淪為一堆悲劇數字。

哈利卡尼喺熱刺出道後，雖然入波當食生菜，被公認為歐洲最強前鋒之一，但佢從未贏過任何正式比賽冠軍，上年為圓捧盃夢，毅然轉投「壟斷」德甲嘅拜仁慕尼黑，可惜結局係德超盃輸波、德盃第2圈出局、德甲被利華古遜打破「11連冠」、歐聯4強飲恨出局。

哈利卡尼今場對皇馬交出助攻，今屆歐聯有8個入波同4次助攻，單季歐聯貢獻12個入球，係英格蘭球員史上最高紀錄。曼聯名宿里奧費迪南表示：「哈利卡尼已交足功課，做到晒拜仁買佢嘅期望，單季入40球以上係不可思議嘅數字，佢唔應該受到指責。」