拜仁終極入波被吹走　迪歷特：旁證認錯！

皇馬對拜仁嘅歐聯4強峰迴路轉，皇馬尾段連入2球反勝2比1後，拜仁曾經喺補時13分鐘由馬菲斯迪歷特射入，但佢起腳前球證已率先「吹雞」判越位，引起極大爭議。馬菲斯迪歷特賽後指旁證向佢承認犯錯，並作出道歉，但對結局無補於事。

比賽去到第103分鐘「補上補」時間，拜仁長傳踢入禁區，馬菲斯迪歷特接應湯馬士梅拿頭槌二傳射入，但旁證原來早早舉旗示意越位，球證亦喺射門前第1時間「吹雞」。慢鏡所見越位嘅差距極為微細，但由於入波前已經吹停，所以VAR無權介入，「事實」係咪越位無從稽考。

馬菲斯迪歷特賽後憤怒表示：「係人都知道，如果越位唔清晰，應該先畀賽事繼續進行，祖斯奴嘅疑似越位入波，佢哋就係咁做。旁證同我講對唔住，承認佢犯錯，但對我嚟講完全冇意義。」意大利著名球證卡華利斯表示，球證正確做法應該係先由得比賽進行，如果造成入球就等VAR去幫手介定，所以旁證同球證喺事件入面都有犯錯。