幕後大玩家！車路士「鎖定」歐聯冠軍

今屆歐聯決賽會由皇家馬德里同多蒙特對壘，冠軍誰屬要到6月2號先知道，不過英超豪門車路士就率先鎖定冠軍，事關皇馬同多蒙特都有嚟自車路士嘅借將，意味「藍戰士」肯定會有球員拎到歐聯冠軍。

多蒙特1月向車路士借用左閘伊恩馬特臣，呢位22歲小將加盟前只有199分鐘嘅英超上陣經驗，但去到多蒙特後迅即成為主力，6場歐聯全部正選兼踢足每1分鐘。據報佢嘅借用合約內，有3,500萬鎊買斷條款，如果多蒙特決定啟動條款，車路士冇得拒絕。

至於皇馬就喺上年借用車路士門將阿列沙巴拿加，佢喺季初係球隊正選，並喺4場歐聯分組賽把關，不過季中開始已被盧寧搶走正選位置，據權威記者Fabrizio Romano報道，皇馬已決定唔會留用阿列沙巴拿加，呢位西班牙門將夏天會重返車路士，而車仔亦好大機會將佢賣走。