維拉組「西甲防線」　馬體會猛將或免費加盟

阿士東維拉喺西班牙名帥艾美利帶領下，今季成績超乎預期，下季大有機會躋身歐聯賽事。為進一步加強實力，據報維拉已接近簽入馬德里體育會守將馬里奧靴莫素，將同迪亞高卡路士、柏奧托利斯組成「西甲防線」。

西班牙《阿斯報》消息，28歲嘅馬里奧靴莫素將喺夏天以自由身離開馬體會，維拉同國際米蘭都想出手，而維拉喺艾美利同總監蒙奇發功下，暫時喺呢場爭奪戰入面領先，希望用佢代替借用期滿嘅法甲左閘基文迪朗格勒。

可踢中堅同左閘嘅馬里奧靴莫素，效力馬體會5年都係施蒙尼主力，並喺20/21球季贏過西甲冠軍，同時有29次歐聯上陣經驗，對下季有望挑戰歐聯嘅維拉嚟講，會係非常寶貴嘅財產。