小不忍亂大謀　阿迪達、高普停賽危機！

英超去到最後直路，冠軍誰屬可能要鬥到煞科戰，不過阿仙奴領隊阿迪達同利物浦領隊高普就要小心，事關佢哋如果喺下場再拎黃牌，就會喺煞科日停賽，錯過全季最關鍵嘅1場比賽。

英超條例規定，領隊每拎3張黃牌就要停賽1場，阿迪達今季已拎5面黃牌，係英超領隊嘅「牌王」， 萬一下仗作客曼聯拎牌，就會喺最後一仗對愛華頓停賽。如果阿仙奴到時仲有機會爭標，而阿迪達坐波監嘅話，隨時令全季努力付之一炬，要知道阿迪達今季已試過停賽1場，阿仙奴就以0比1輸畀阿士東維拉。

利物浦亦有類似情況，雖然佢哋好可能到煞科戰已爭標無望，不過主場對狼隊會係高普嘅「紅軍」告別戰，而高普依家已有2張黃牌，如果作客維拉再食牌，利物浦嘅「歡送儀式」就會冇咗個主角，都咪話唔尷尬！