13萬人口小城創奇迹　阿特蘭大首次入歐戰決賽

周五(10日)凌晨歐霸盃4強次回合，阿特蘭大主場以3比0大勝馬賽，兩回合合計贏4比1，球隊史上首次打入歐洲賽決賽，繼打入2020年歐聯8強後，再創造另一次奇迹。呢支意大利奇兵所在城市貝爾加莫人口只有13萬，卻能孕育出一支足以問鼎歐洲大賽錦標賽嘅勁旅，令人嘖嘖稱奇。

雙方首回合打和1比1，阿特蘭大返回主場狂攻對手，全場有17次射門，馬賽只有6次。戰至30分鐘，盧卡文喺禁區邊起腳射入，為阿特蘭大打開紀錄。換邊後冇耐，阿特蘭大透過1次美妙組織，由路基利射成2比0。踢到補時，法甲球隊馬賽推得太前搶攻，防線空虛，後備上陣嘅艾比拉爾托尼左路個人突破後射入，贈對手3蛋。

阿特蘭大以往喺歐洲賽最威水係打入1988年歐洲盃賽冠軍盃4強，以及2020年歐聯8強，今季取得突破，首次晉身歐洲賽決賽，將於5月23日凌晨同德甲盟主利華古遜爭奪冠軍。

雖然利華古遜已保持各項賽事49場不敗，但雙方曾於2022年歐霸盃16強交鋒，阿特蘭大兩回合都擊敗利華古遜，有力再次創造奇迹。