維拉再吞兩蛋　英超球隊歐戰全軍覆沒

周五(10日)凌晨歐協聯4強次回合，奧林比亞高斯主場以2比0擊敗阿士東維拉，兩回合合計大勝6比2，晉身決賽，將於5月30日凌晨同費倫天拿爭奪冠軍。隨住維拉出局後，意味今屆歐洲3大盃賽決賽，都冇英超球隊。

希臘球隊奧林比亞高斯首回合作客，憑前鋒阿尤比艾卡比上演「帽子戲法」入3球，以4比2擊敗對阿士東維拉，呢位30歲摩洛哥今場次回合又做主角，個人梅開二度，換言之，佢兩回合總共轟入維拉5球，今屆歐協聯已有10球進帳，排射手榜第1位。

由於另1支決賽球隊費倫天拿入波最多嘅球員比特蘭只有4球進帳，相信阿尤比艾卡比好大機會奪得今屆歐協聯神射手獎。

相比起英超球隊今屆歐洲賽全軍覆沒，意甲球隊及意大利教練成為大贏家，阿特蘭大、費倫天拿分別晉身歐霸盃、歐協聯決賽，加上歐聯決賽球隊皇馬由安察洛堤執教，換言之3場決賽都有意大利籍教練領軍。