格列沙加成歐洲創造王　羅馬「小器」走寶

利華古遜今季狀態巔峰，除教練沙比阿朗素居功至偉，去年由阿仙奴加盟嘅格列沙加亦係大功臣，佢喺歐霸4強次回合對羅馬一戰，10次喺生波情況創造機會，係歐聯同歐霸有紀錄以來單場最高紀錄(追平桑馬達喺2010年紀錄)，包括97分鐘助攻史坦尼錫追平2比2。

利華今季49場不敗，格列沙加參與咗46場，只有1場德甲停賽，同埋歐霸分組賽最後2輪休息，絕對係沙比阿朗素心目中嘅靈魂人物。呢位31歲中場賽後表示：「我哋明明有好多機會，唔知點解會落後2球，但球隊能夠重新振作保持不敗，真係令人起晒雞皮，我哋一定會全力將冠軍帶返德國。」

有趣嘅係，格列沙加喺3年前無限接近加盟羅馬，當時摩連奴視佢為收購頭號目標，但羅馬只願支付2,000萬歐元，唔肯達到阿仙奴要求嘅2,500萬歐元轉會費，結果為咗區區500萬歐元而走寶。