馬天尼斯復操！坦哈格望傷兵「頂硬上」

曼聯飽受傷兵煎熬，今季有多達64次球員傷病情況，不過周日(12日)主場迎戰阿仙奴前就有好消息，利辛度馬天尼斯同拉舒福特已經喺周四(9日)復操，領隊坦哈格更要求一眾傷兵「頂硬上」，如果唔係嚴重受傷都盡可以捱到收咧。

由於曼聯人手極度短缺，上場對水晶宮嗰陣，莊尼伊雲斯養傷1個月復出即被推上正選，坦哈格都承認佢嘅情況並唔適合擔正。據英國《太陽報》報道，坦哈格亦要求其他球員共度時艱，除非真係傷到踢唔到，否則盡可能都要候命落場比賽。

周四操練入面，養傷1個半月嘅利辛度馬天尼斯首度復操，缺席近3場比賽嘅拉舒福特亦重投操練，2人好大機會對阿仙奴上陣。另外，般奴費南迪斯同麥湯米尼雖然並冇參加操練，但消息指兩人傷勢並唔嚴重，同樣有望喺對阿仙奴一仗復出。