【官宣】佐真奴續約1年　另一人要離開？

英超勁旅阿仙奴周四(9日)宣布，同意大利國腳佐真奴達成續約1年協議，下季將會繼續留效「兵工廠」，呢位32歲老將留隊，意味另一中場湯馬士柏迪好大機會喺夏天被賣走。

32歲嘅佐真奴上年加盟阿仙奴後，場內場外都發揮影響力，雖然佢唔係必然正選，但領隊阿迪達視佢為「球場內嘅教練」，經常見佢指手畫腳指揮隊友。阿迪達喺佢續約後表示：「佐真奴係球隊重要一員，佢嘅領導能力係模範級別，獨特嘅踢法能夠令身邊隊友變得更好，好開心佢同佢家人決定繼續同阿仙奴走呢個旅程。」

據報阿仙奴今個夏天將重金收購一名中場，作為迪格蘭賴斯嘅長期拍檔，所以佐真奴同湯馬士柏迪只會留用其中1個，依家佐真奴正式續約，意味湯馬士柏迪好可能會被放棄，之前有傳祖雲達斯、巴塞隆拿同沙特阿拉伯球會都有興趣收購湯馬士柏迪。