【官宣】佐真奴续约1年　另一人要离开？

英超劲旅阿仙奴周四(9日)宣布，同意大利国脚佐真奴达成续约1年协议，下季将会继续留效“兵工厂”，呢位32岁老将留队，意味另一中场汤马士柏迪好大机会喺夏天被卖走。

32岁嘅佐真奴上年加盟阿仙奴后，场内场外都发挥影响力，虽然佢唔系必然正选，但领队阿迪达视佢为“球场内嘅教练”，经常见佢指手画脚指挥队友。阿迪达喺佢续约后表示：“佐真奴系球队重要一员，佢嘅领导能力系模范级别，独特嘅踢法能够令身边队友变得更好，好开心佢同佢家人决定继续同阿仙奴走呢个旅程。”

据报阿仙奴今个夏天将重金收购一名中场，作为迪格兰赖斯嘅长期拍档，所以佐真奴同汤马士柏迪只会留用其中1个，依家佐真奴正式续约，意味汤马士柏迪好可能会被放弃，之前有传祖云达斯、巴塞隆拿同沙特阿拉伯球会都有兴趣收购汤马士柏迪。