水貨變「傳球大師」　高華錫成曼城爭冠關鍵人物

曼城上年夏天向車路士收購中場高華錫，接替離隊嘅根度簡，呢位克羅地亞國腳上半季表現令人失望，一度被嘲諷係「水貨」。不過，高華錫下半季愈戰愈勇，季尾更深受主帥哥迪奧拿重用，近4場英超有3場擔任正選，佢精準傳球能力，成為「藍月亮」取勝關鍵。

曼城上場英超以5比1大勝狼隊，高華錫有93次觸球，並且77次傳球有73次成功交畀隊友，傳球成功率高達95%，該仗僅次於隊友基爾獲加(96%)。如果以全季英超計算，高華錫傳球成功率達到93.7%，屬於曼城全隊之冠，串聯組織發揮重要作用。英國傳媒認為，如果曼城想最後3場聯賽全勝捧盃，就必須由高華錫擔任正選。

另外，由於貝拿度施華可能今夏離隊，德國《圖片報》指曼城計劃收購RB萊比錫中場丹尼爾奧莫，填補位置，呢位26歲西班牙國腳唔止表現出色，而且出身於巴塞隆拿青訓系統，應該適合曼城主帥哥迪奧拿嘅戰術要求，「藍月亮」可能用6,500萬歐元(約5.47億港元)毀約金直接買斷佢。