巨星時代結束　PSG發布新波衫冇麥總

巴黎聖日耳門(PSG)周五(10日)發布新一季主場球衣，宣傳物品中已經冇咗王牌球星基利安麥巴比身影，意味住「麥總」即將離隊，而PSG亦正式告別巨星年代。

PSG新波衫設計其實冇咩特別，只係將左胸嘅紅色移到正中間，當然係採用最新物料，最特別係過往嘅「生招牌」麥巴比，已經唔再喺宣傳影片或海報中亮相，而改為大堆頭登場。

會方揀咗幾位主力喺新衫海報同影片亮相，分別係隊長馬昆賀斯、紐奴文迪斯阿歷山大、盧卡斯靴南迪斯、域天拿，以及1位女足球員等。

據報麥巴比已同皇馬達成協議，來季加盟，最快會於歐聯決賽後翌日，即6月初正式官宣，而PSG今季尚餘3場聯賽，同埋法足盃決賽對里昂，將會係「麥總」告別戰。