百無禁忌　利華古遜搵波歷克做德盃大使

利華古遜順利打入歐霸盃決賽，「小3冠」叫胡，並且準備開創全季不敗捧3盃嘅神迹，佢哋今季最後1場係德國盃決賽對凱沙羅頓，會方就請嚟名宿波歷克做球隊大使，利華古遜百無禁忌，完全唔驚畀波歷克嘅「二奶命」邪親！

47歲嘅波歷克將會以利華古遜代表身分出席獎盃交接儀式，決賽當日亦會擔任球隊大使現場觀戰，佢話：「好榮幸擔任利華古遜球隊大使，佢哋今季表現令人難以置信，踢出統治力、吸引力同成功嘅足球。」

利華古遜早前打破魔咒，力壓拜仁提前奪取德甲冠軍，呢個成就係由無數前輩先賢累積而來，其中波歷克佔好重分量，佢喺01至02年球季率領利華古遜在德甲、德盃同歐聯獲得3料亞軍，之後再喺10至11年球季再攞多次德甲亞軍。

至於波歷克個人履歷，仲有2002世盃亞軍同2008歐國盃亞軍，同埋效力車路士期間嘅07至08年歐聯亞軍；雖然，波歷克效力拜仁同車路士期間，都捧過好多盃，但佢「二奶命」嘅悲情形象，可謂深入民心。