法比加斯教波有料到　率科木升上意甲

意乙常規賽煞科，科木主場以1比1逼和科森察，成為亞軍，取得直接升班資格，相隔21年後，再次獲得意甲席位。呢支「神奇球隊」由法比加斯擔任「影子主帥」，呢位37歲西班牙名宿執教波有料到。

法比加斯兩年前加盟科木，作為球員生涯最後一站，上年夏天掛靴，並擔任科木青年軍教練。科木上年11月炒咗教練朗高，法比加斯臨危受命擔任看守教練，由於佢冇歐洲足協職業教練牌，只獲1個月豁免期，會方聘請前水晶宮助教羅拔斯做看守教練，法比加斯退居助教一職。

一般相信羅拔斯只屬「掛牌教練」，法比加斯先至係真正話事人，等佢考到教練牌之後，就會重掌帥印。

另外，帕爾馬獲得意乙冠軍，闊別3季之後，將重返意甲。