皇馬B隊都夠殺　古拿又入波獲肥安力捧

已奪西甲冠軍兼殺入歐聯決賽嘅皇家馬德里，周日(12日)凌晨聯賽雖然派出全部副選，作客仍然輕鬆4比0大炒CF格蘭納達，土耳其新星艾達古拿又有波入，今季平均每85分鐘就有1個入球，教練安察洛堤賽後表明艾達古拿下季必定留隊，而且未來會成為皇馬領袖。

皇馬今場作出10個變動，正選只有魯迪格係上場歐聯正選，不過球隊戰力未受動搖，上半場由法蘭加西亞同艾達古拿入波領先2比0，換邊後再有巴謙戴亞斯「起孖」，湊成4比0大勝。皇馬喺西甲已連續29輪不敗，距離隊史最長聯賽不敗走勢(88/89球季)只差1場。

19歲嘅艾達古拿今季第3次喺西甲擔正，拎到個人第3個入波，安察洛堤賽後大讚：「艾達古拿今季上陣唔多，原因為隊內競爭太激烈，但佢仲好後生，需要有更多耐性，下季一定會繼續留低。艾達古拿係天才球員，一步一步咁行，佢將來會成為皇馬嘅領袖。」