洛迪挑戰英超不敗紀錄　落選最佳球員得啖笑

曼城向史無前例嘅英超4連冠進發，西班牙中場洛迪卡斯簡迪係關鍵人物，佢喺上場大勝富咸一仗，將個人英超不敗紀錄增加到48場，有望挑戰阿仙奴名將蘇甘保嘅56場終極紀錄。洛迪早前落選英超年度最佳球員8人候選名單，唔少球迷都話得啖笑。

洛迪係曼城嘅靈魂人物，佢有份上陣嘅比賽，曼城各項賽事已連續71場不敗，如果單計英超聯賽，洛迪在陣亦已連續48場冇輸過，追平亨利同高路托尼排英超史上第2位，只係落後2002年11月至04年10月間

56場不敗嘅蘇甘保。

雖然洛迪嘅影響力驚人，但最近英超年度最佳球員候選，佢就未能進入最後8強，曼城領隊哥迪奧拿表示：「洛迪係英超最佳球員之一，名單上嘅球員都值得入選，不過英超好球員太多，最重要係佢知道我哋覺得佢有幾重要、有幾出色，洛迪唔會為呢啲事(落選最佳球員)而傷心。」