拉爵重建紅魔揭序幕　華拉尼宣布離隊

曼聯周二（14日）在官網發布，今季季尾約滿嘅後衞華拉尼，將以自由身離隊，結束3季紅魔生涯，有指呢位31歲中堅因傷患太多，令紅魔決定唔同佢續約，亦揭開曼聯班主拉特克利夫重建序幕。

曾協助法國勇奪2018年世盃嘅華拉尼，2021年8月從皇馬加盟曼聯，至今上陣93次，共入2球，並在上季為球隊奪得英聯盃，亦係紅魔6年來首個重要錦標，呢位經驗豐富嘅31歲中堅，上年更決定退出法國隊，專心為紅魔效力。可惜華拉尼加盟後經歷多次大大小小嘅傷病，無復當年勇，自從4月頭未再上陣過，能否趕及喺餘下賽事披甲亦成疑問。

曼聯自從「拉爵」拉特克利夫入主後，致力重建球隊，英國傳媒列出多個清洗名單，高薪一族嘅華拉尼都榜上有名，因此佢最終宣布離隊亦唔意外，早前有指華拉尼會加盟沙特阿拉伯勁旅艾納斯，與C朗第三度做隊友。