祖雲達斯奪意盃冠軍　阿里基失控博炒！

周四(16日)凌晨意盃決賽，祖雲達斯憑杜辛華荷域開波4分鐘嘅入波，以1比0擊敗阿特蘭大，歷史性第15次捧走意盃冠軍。祖記教練阿里基今場成為焦點，雖然佢帶領球隊捧盃兼創紀錄，但完場前剝衫向球證咆吼被逐，賽後慶祝期間又無禮趕走同佢不和嘅總監，連串失控行為擺明「博炒」。

祖雲達斯今場尾段受壓，阿里基亦情緒爆發，補時階段因不滿球證判決，佢即刻激動除低外套、掟走埋條領帶向第4球證咆吼，被趕出場後仲除埋恤衫嘅紐扣，幾乎想「剝光豬」咁滯。祖記最終頂到完場捧盃，阿里基個人第5次贏意盃，超越文仙尼同艾歷臣4奪意盃紀錄，成為史上贏意盃冠軍最多教頭。

雖然有冠軍落袋，不過祖雲達斯依家喺聯賽只排第4，盛傳總監基安度利一直想「郁」阿里基，改聘博洛尼亞嘅莫達執教。阿里基賽後同球員擁抱慶祝後，突然指向外面一個人大叫「走開、走開」，消息指阿里基係叫基安度利唔好走埋嚟叨光，同高層矛盾勢必加深佢被炒危機。