英超下季擬廢除VAR　20隊投票決定

英超5年前引入VAR系統幫助執法後，出現嘅爭議判決有增無減，狼隊周三(15日)動議由下季開始，廢除VAR執法制度，英超20支球隊將會喺6月6日嘅會議中進行投票，如果有14間球會投讚成票，英超下季就會同VAR講Bye Bye。

動議廢除VAR嘅狼隊發聲明表示：「我哋唔係想指摘乜嘢，只係想足球變得更好，所有持份者都好努力令引入嘅科技獲得成功，但經過5季VAR試驗，係時候再做建設性同批判性嘅辯論。我哋嘅立場係VAR令判決準確度些微提升，但就付出違背體育精神嘅代價，所以狼隊提議下季開始廢除VAR。」

英超喺6月6號將會舉行股東大會，據報有關廢除VAR嘅草案會喺會上進行投票，規例列明新法要得到至少14張支持票先可以通過。消息指英超賽會堅決反對廢除VAR，《CBS》消息亦指多數球會都唔認為廢除VAR係合適做法，動議未必獲得通過。