【有片】法國雙星告別曼聯　馬迪爾最後讚歌

曼聯周四(16日)凌晨3比2贏紐卡素，係球隊今季最後一次喺主場亮相，季尾將會離隊嘅華拉尼同安東尼馬迪爾，完場後現身球場同粉絲告別。效力曼聯9年嘅馬迪爾，近年表現備受批評，不過告別嗰陣就獲球迷送上最後讚歌，場面感人。

華拉尼早前宣布季尾離隊，同樣約滿嘅馬迪爾雖然並冇證實去向，但結束9年曼聯生涯亦已成定局，兩人對紐卡素雖然並冇上陣，但完場後同球迷揮手道別。有部份曼聯球迷高唱馬迪爾嘅打氣歌，呢位28歲前鋒就狂拍心口會徽，享受球迷送畀佢嘅讚歌。

球迷唱歌致敬馬迪爾：https://twitter.com/i/status/1790855592484933632　

至於2021年夏天加盟嘅華拉尼，同樣對奧脫福依依不捨，佢等到球迷全部離開後，一個人坐喺球場中圈，懷緬過去3年嘅曼聯點滴。華拉尼早前表示，上年協助曼聯贏得英聯盃冠軍，係佢一世都唔會忘記嘅寶貴回憶。