踢422分鐘做紅牌大王　列斯占士下季停3場

車路士隊長列斯占士今季傷多過踢，復出冇耐嘅佢，周四(16日)凌晨作客白禮頓一戰，後備上陣19分鐘就因報復踢人，被球證出示紅牌趕出場。列斯占士喺季初對紐卡素亦食過紅牌，今季只係踢422分鐘聯賽，就成為英超紅牌大王，下季開季頭3場亦面臨停賽。

英超今季有3人拎過2張紅牌，分別係熱刺中場比蘇馬、錫菲聯嘅奧利華麥貝尼同車路士嘅列斯占士，不過比蘇馬踢咗超過2,000分鐘、奧利華麥貝尼亦踢接近1,300分鐘，列斯占士只用422分鐘就登上榜首，「效率」奇高。車路士領隊普捷天奴賽後表示：「我睇唔到事發過程，所以畀唔到意見，紅牌令今場美妙勝仗蒙上污點，列斯占士對球隊好重要，但佢下季季初又要停賽。」

列斯占士今次直接領紅，而且係今季第2張紅牌，按例要停賽4場，除煞科戰對般尼茅夫坐波監，下季開季頭3輪聯賽亦要服刑。另外，列斯占士原本仲有一絲希望踢歐國盃決賽周，但煞科戰停賽令佢又少一個機會證明自己狀態，入選英格蘭大軍機會更微。