還是覺得你最好？拜仁同杜曹傾續約

拜仁慕尼黑今季「四大皆空」，教練杜曹喺2月份已宣布季尾離隊，不過拜仁物色新帥行動處處碰壁，據報球會依家正同杜曹商討繼續合作，而杜曹就要求拜仁開出2年新約以表「誠意」，有望達成共識。

自杜曹宣布離隊後，拜仁先後搵過沙比阿朗素、拿高斯文、蘭歷克等名帥接手，但通通都「食檸檬」，據德國《踢球者》、《圖片報》同《天空體育》等權威媒體報道，拜仁高層周三(15日)同杜曹代表會面後，已決定要求杜曹繼續留隊執教。

雖然拜仁榮譽會長漢尼斯早前曾猛烈批評杜曹，但呢位50歲教頭仍樂意留任，前提係拜仁要展示出合作誠意，包括同佢續約至少到2026年，證明自己唔係「水泡」。有傳1年後沙比阿朗素想轉工，以或者高普小休後重出江湖，拜仁就會出手爭奪。