平價組軍！巴塞隆拿睇中華拉堤

巴塞隆拿獲沙維答應留任後，隨即為下季買人展開籌備，由於受到財政問題影響，佢哋需要用「最經濟」嘅方式完成組軍，其中一個目標係斟喺卡塔爾落班嘅馬高華拉堤，相信呢位前意大利國腳回流歐洲仍然可以交到貨。

中場係沙維希望夏天加強嘅地方，不過蘇比文迪、阿馬度奧拿拿等心儀人選轉會費唔平，據西班牙《世界體育報》報道，巴塞考慮物色平價人選，除咗即將簽入夏天回復自己身嘅古度洛迪古斯外，效力艾阿拉比嘅馬高華拉堤亦係收購目標，佢今季喺卡塔爾聯賽17次上陣交出7次助攻，戰鬥力仍在。

華拉堤同艾阿拉比合約到2025年，而且佢亦樂意重返歐洲，能夠為巴塞效力更加難以拒絕。據報巴塞有信心可以將轉會費傾喺1,000萬歐元至1,500萬歐元。