終入豪門！修咸頓門神獲利物浦垂青

正喺升班附加賽為重返英超努力嘅修咸頓，可唔可以升班仲未知數，不過34歲老牌門將阿歷士麥卡菲，下季幾乎肯定會喺英超出現，據報以利物浦為首嘅多間英超球會，都有意簽入呢位即將回復自由身嘅球星。

阿歷士麥卡菲效力修咸頓8年，近2季已淪為大後備，原本諗住坐到夏天完約，點知正選門將巴斯奴上月重傷，阿歷士麥卡菲臨危受命把關，升班附加賽4強首回合救出西布朗2個必入球。不過呢位前英格蘭國腳人工太高，修咸頓將唔會同佢續約。

據英國《衞報》報道，利物浦、紐卡素、水晶宮、韋斯咸都想打佢主意，利物浦希望引入「本土球員」出任2號門將，經驗豐富嘅阿歷士麥卡菲就成為心水人選。阿歷士麥卡菲出道以來從未效力頂級球會，估唔到喺足球生涯尾聲，終於有「嫁入豪門」機會。