施洛接高普「大鎖匙」　住利物浦「宿舍」

荷蘭教頭施洛下季執教利物浦已成定局，只係差官方確認，呢位45歲教頭唔單止會接高普嘅「紅軍」帥印，仲會接埋高普豪宅嘅大鎖匙。據報施洛將會入住高普依家住緊嘅豪宅，而呢間豪宅係由利物浦官方持有。

英國《每日鏡報》報道，高普依家位於柴郡Formby Village嘅豪宅，價值高達400萬鎊，屋內有7間睡房，又有巨型花園、室內泳池同私人影院等等，之前嘅業主包括前隊長謝拉特同前領隊羅渣士，而利物浦喺2019年向羅渣士買入業權，再免費租畀高普，令豪宅變成利物浦嘅「宿舍」。

高普喺Formby Village生活9年，經常會去當地酒吧同餐廳，成為當地人嘅超級偶像，據報近日已有搬運車去到進行搬遷準備，消息指高普打算先去西班牙嘅馬略卡島居住，佢2年前喺馬略卡島已用340萬鎊買入一間別墅，可以享受悠長假期。