艾斯高：如果有得踢歐國盃　會取消蜜月

今季喺貝迪斯重生嘅艾斯高，據報有機會入選西班牙大軍，參與今夏歐國盃，32歲嘅艾斯高已做好準備，買定取消機票嘅保險，一旦入選國家隊，就取消度蜜月。

《阿斯報》報道，西班牙國家隊將於月底公布26人名單，踢過2018俄羅斯世盃嘅艾斯高有望重返國家隊，原來佢已經安排好今個夏天度蜜月，佢話：「我要去度蜜月，不過依家要睇睇，仲買定取消機票嘅保險，等待西班牙國家隊嘅電話。」

艾斯高曾經喺皇馬有過風光時刻，但離隊後狀態急跌，2023年初更一度失業半年，去年夏天自由身加盟貝迪斯獲得重生，事業重回巔峰，今季西甲19次當選全場最佳，排名第1，又當選4月最佳球員，全季交出9球7助攻。

國家隊方面，艾斯高曾經喺2013至19年入選狂牛兵團，征戰2018俄羅斯世盃，生涯為西班牙上陣38場入12球。