沙维讲真话激嬲高层　随时被迫执包袱

周五(17日)凌晨西甲，巴塞隆拿作客以2比0击败艾美利亚，但赛前教练沙维讲出有关球会财政欠佳，将影响下季组军嘅言论，疑似激嬲巴塞会长拉波塔，甚至有人献计，建议解雇呢位少帅。

今仗系沙维第100场西甲领军，早前佢接受传媒访问时话：“我哋下季目标应该改变，以吸纳人才为首要工作，否则成绩可能同今季一样，但都要睇球会财政情况，拉波塔同迪高总系以正面态度睇未来，但财政决定咗一切，巴塞难以同最佳球队竞争，特别系财政方面，以往巴塞嘅教练可以签入想要嘅球员，但现时情况完全唔同。”沙维言语之间似埋怨管理层对佢支援不足，惹起拉波塔不满，一改以往随队出征做法，今次并冇入场睇波，爆出有人建议拉波塔炒沙维。

赛后沙维被问到佢可能下台传闻，佢坚持自己只系讲真话，呢位44岁西班牙名帅曾于今年1月公布今夏离队，但上月改变主意，决定留任，经过今次“讲真话”事件后，可能又会走人。