勞基梳爾無緣英足盃決賽　參加歐國盃成疑

曼聯將於5月25日晚英足盃決賽對曼城，領隊坦哈格透露，已養傷3個月嘅左後衞勞基梳爾應該無法復出踢呢場大戰，至於能否參加今屆歐國盃亦成為疑問。

坦哈格曾經希望勞基梳爾今季結束前復出，英足盃決賽屬於今季最後一場比賽，呢位荷蘭名帥終於承認勞基梳爾復出無望：「梳爾嘅傷勢比較複雜，踢英足盃決賽機會非常低，至於哈利馬古尼可以復出。」英國傳媒指曼聯周日(19日)晚英超煞科戰作客白禮頓，哈利馬古尼仍然會缺陣，留力踢英足盃。

隨住勞基梳爾將錯過曼聯今季最後一場比賽，令人懷疑佢能否入選英格蘭大軍名單出戰6月14日展開嘅歐國盃。英國《每日郵報》指勞基梳爾會唔會入選，取決於英軍領隊修夫基對佢嘅信任程度，眾所周知「修哥」用人唯親，包括徵召養傷多時嘅加雲菲臘斯參加上屆世界盃，所以唔排除勞基梳爾仍然有機會入選，英格蘭將於下周二(21日)公布初選名單。