荷兰公布30人初步名单　34岁白兰特有份

荷兰国家队主帅朗奴高文公布出战今届欧国杯嘅30人初步名单，加普、华基尔云迪积克、尼敦阿基、迪比、法兰基迪庄等主力都有入选，连带34岁“再生战士”戴利白兰特亦有份，成为阵中唯一累积上阵超过100次嘅球员。

朗奴高文关照唔少老将，除咗效力西甲神奇球队基罗纳嘅戴利白兰特之外，已去沙特搵食嘅33岁中场韦拿杜姆，同样33岁阿特兰大中场迪鲁恩，32岁国际米兰中坚迪维积都榜上有名，配合年轻当打嘅沙维西蒙斯、当耶尔马伦，人脚相当完整。

此外，协助利华古逊捧今季德甲冠军嘅谢利美费林邦有入选，令人充满期待，呢位23岁右翼卫今季联赛入9球及7次助攻，表现光芒四射，即使朗奴高文曾批评佢防守能力弱，但都系向现实屈服，征召谢利美费林邦。不过，今季喺博洛尼亚有出色表现嘅射手约舒亚舒克斯落选。

至于今季为阿特兰大射入15球嘅中场古普美拿斯亦系“橙衣兵团”另1位奇兵。朗奴高文之后会将30人名单缩减至26人参赛。